أكثر حاجة نفد منها هي الشوارع الموسخة ، بالاخص وسط البلاد وين ما تمشي تلقى كان الزبلة عالمين و عاليسار، صحيح البلدية مقصرة و موش موفرة الحاويات بالعدد الكافي أما حتى أحنا خامجين أكثر من اللازم يعني شوية من الحنة و شوية من رطابة اليدين موش كل شيء نلسقوه للبلدية قال شنوه هي المسؤلة عالنظافة ، عالحساب هذا البلدية تعمل عامل نظافة وراء كل مواطن و شوف و شوف تسلكها و إلا لا.
برجولية كثرنالها من اللامبالات، و الله فمة حاجة مافهمتهاش ، عندنا راجل في الحومة كل ليلة يخرج يطيش الزبلة، صحيح عندو سطل قدام باب الدار أما عمرو ما يرمي فيه، كل مرة يرمي في سطل واحد من الجيران، هكة اعلاش قررت كل ليلة وين ما نشوفو يطيش في سطل الجيران نمشي نحولها قدام دارو باش يحشم على روحو شوية و يفهم أنو الناس فايقة به. و لكن زايد كيما يقولو 'العربي عربي' و اللي فيه طبه عمرها ما تتخبى.
أنا الحملة هذي عجبتني برشا و قررت اني نشارك فيها و ان شاء الله يجي نهار نجدوا الموطنين الكل مشاركين فيها و نهار الاحد الناس الكل تخرج للشوراع و تبدى تنطف، حتى و لو كل واحد قدام دارو هكة نضمنوا أنو الناس الكل قبل ما تطيش أي حاجة في الشارع تخمم كيفاش نهار الاحد تعبت في تنطيف هذا الشارع.
أيا يا سيدي دقت ساعة العمل دقت ساعة النظافة ، كلنا نهار الاحد في الميدان نظفوا بلادنا زنڨه زنڨه شارع شارع بيت بيت كياس كياس ، للامام للامام
